„დაგროვებითი პენსიის შესახებ“ კანონში დაგეგმილი ცვლილებები
საქართველოს პარლამენტმა პირველი მოსმენით, დაჩქარებული წესით მიიღო „დაგროვებითი პენსიის შესახებ“ საქართველოს კანონში ცვლილებების შეტანის შესახებ კანონპროექტი, თანმდევ საკანონმდებლო პაკეტთან ერთად.
ცვლილებების მთავარი მიზანია საპენსიო შენატანის განხორციელების ვალდებულებასთან დაკავშირებული წესების ერთიანად მოწესრიგება და აღნიშნული ვალდებულების დარღვევის შემთხვევაში ადმინისტრაციული პასუხისმგებლობის ახალი მექანიზმების შემოღება.
საკანონმდებლო პაკეტი ითვალისწინებს 2025 წლის 1 მაისის შემდგომ საპენსიო ფონდის მიერ დაკისრებული ჯარიმებისგან დამსაქმებელთა პირობით გათავისუფლებას.
შეღავათით სარგებლობისთვის დამსაქმებელმა საპენსიო შენატანები და შესაბამისი საურავები სრულად უნდა დაფაროს არაუგვიანეს 2026 წლის 31 დეკემბრისა.
ასევე, საპენსიო შენატანის განუხორციელებლობის შემთხვევაში დამსაქმებლისთვის დასაკისრებელი ჯარიმის ოდენობა იცვლება. კერძოდ, პირველ და განმეორებით შემთხვევებში მოქმედი 500 და 1,000 ლარის ნაცვლად, ჯარიმა განისაზღვრება 300 ლარით.
ამასთან, ცვლილებების მიხედვით, თუ დამსაქმებელი დაკისრებულ საპენსიო შენატანს 10 დღის ვადაში დაფარავს, შესაბამისი ჯარიმა გაუქმდება, ხოლო ჯარიმის გასაჩივრების შემთხვევაში მისი აღსრულება შეჩერდება.
საკანონმდებლო პაკეტი ითვალისწინებს საპენსიო ფონდის დამოუკიდებელი დავების განხილვის სამსახურის შექმნას, რაც საპენსიო შენატანებთან დაკავშირებული დავების განხილვის დამატებით მექანიზმს შექმნის.
ამასთან, შესაძლებელი გახდება საპენსიო შენატანისა და დარიცხული სარგებლის ეტაპობრივი გადახდა 18 თვემდე ვადით.
ამრიგად, კანონპროექტით გათვალისწინებული გარდამავალი საშეღავათო პერიოდი საშუალებას იძლევა, შესაბამისი პირობების დაკმაყოფილების შემთხვევაში, 2025 წლის 1 მაისის შემდგომ დაკისრებული ჯარიმებისგან გათავისუფლება მოხდეს.
ვინაიდან აღნიშნული ცვლილებები ამ ეტაპზე პარლამენტის მიერ პირველი მოსმენითაა მიღებული, საბოლოო შინაარსი შესაძლოა კანონპროექტის შემდგომი განხილვის პროცესში დაზუსტდეს ან შეიცვალოს.
